सुबाई: तामाङ ह्युल्बाला खप्पाइ बिमा ग्रेन सांस्कृतिक प्रिपा मञ्जुश्री संवत २८६२औं ता ल्हो सोनाम ल्होछारला दुइसाङरी सिन्धुपाल्चोक तामाङ ह्युल्बा युएईसे खापा जनबरी १८ तारेखरी ग्रेन घेताङ लापाइगेन मुला | “राष्ट्रिय प्रिपा सोनाम ल्होछार ह्युलला शान, ग्योइ-धर्म तेन सांस्कृति ह्याङला पहिचान” बिपा मूल नाराला छ्यामरी सिन्धुपाल्चोक तामाङ ह्युल्बा युएईसे खापा जनबरी १८ तारेख लानी रे कुनु दुबाइ शहरला बरदुबाईला क्लब SK 7 री चु घेताङ तिसेला |
घेताङला खप्पाइ बिमा ग्रेन जेसुम नेपालला चर्चित खान्दोके सेलो काइपा प्रेम योन्जन, चर्चित सेलो काइमो लमु शेर्पा, चर्चित म्हेन्दोमाया काइमो लक्ष्मी स्याङतानसे ह्राङला ल्होल्हो व्हाइ कोसेला | तामाङ ह्युल्बाला सांस्कृतिक जोम्ना(घेताङ)तज्याना लासी धिर छुना लासि धङबारी नेपाल ग्याम्से फेप्कापा ङान्ना डोन्बो काइपा काइमो कातेसे ह्राङला लोकप्रिय ह्वाइ कते कोसी जोम्ना त छुना लासेला मुला |
।
सिन्धुपाल्चोक तामाङ समाज युएई से ह्राङला ग्योइ, धर्म, संस्कृति, कला तेन परम्परा त ल्हेना तेन सोना लापारी चुराङ लासिन ल्हामन घेताङ कते स्हेङ्सी खपान मुला | चुनोन संस्थाला चोहो राजु नगरकोटि तामाङसे चुपाल्सेला ल्होछार घेताङ ल्हामन ज्याबा तासेला बिशी सेम न्हाङ ह्यान्देन बिश्वास लासि स्युबा ल्हेङबो थान्बा मुला |
थेसे पाङस्युबा ह्राङनोन “सोनाम ल्होछार ह्याङला पहिचान तेन गौरबला प्रिपा हिन्न | ओम चुराङ लासि लापा घेताङ कतेसेन् ह्युल भन्दा थारेङ तासाइनोन ह्याङला संस्कृति तेन परम्परा त ल्हेना तेन सोना लापारि ग्रेन योगदान तापा मुला” |
ओजान घेताङरी नेपाल ग्याम्से दोकापा काइपो काइमो तेन छ्याम युएईरीन मुपा काइपा काइमो कते अन्जु स्याङतान, मिना मोक्तान, आस्मान लोप्चान, अमृत तामाङ(जिग्रि), प्रमिला वाइबा तामाङ, सृष्टि लामा, काजल तामाङ, छ्यामरी काइपा प्रबेग दोङसेइनोन ह्राङला संस्कृतिक घेताङ थान्सेला मुला |
थेरराङ तापासेन चुपाल्सेला घेताङ ज्याना लासि तिसेला म्हान्बा मुला | युएई NRNA ला चोहो भिम मल्ल ग्रेन डोन्बोला ओन्छाङरी लाई लापा थेनोन घेताङला सेम डोन्पोरी नेपाल समाज युएईला चोहो राम मोक्तान, जनजाती महासंघ युएईला चोहो भाहरथि कुमार भागत, युएई NRNAला सचिब सबिन योन्जन डोन्बो तासेला मुलाबितासी घेताङ स्हेङ्गेन फेपेसे पाङ्स्युबा मुला |
सिन्धुपाल्चोक तामाङ समाज युएईसे चुराङबा सांस्कृतिक घेताङ चेकेन आहिन्न ल्होलो घेताङ कतेइ नोन ह्युसाला लागिरि स्हेङ्सी खापाला मुला | असहाय त सहायोग, दुङालरि मुबा कतेता सहायोग लासि खापा चु संस्थाला फेपे कतेसे चुपालसेला ल्होछार री दुबाइ ङाम ङाम मुपा मोक्कोन तामाङ कते ओम छ्यामरी स्ह्यान्दो ल्होछार सेम निपा म्हि जुकुता ल्होछार घेताङरी दोकापारी डेन् लापा मुला |
घेताङ ज्याबा ताकाइ बिसि ङानिला सेम घ्यामसेइनोन म्होइगोला लापा मुला |
