राजनीतिमा चिनजानका धेरै बाटा हुन्छन् |कतै औपचारिक बैठकबाट, कतै आन्दोलनको मोर्चाबाट, त कतै सत्ता र पदको घेराबाट। तर पछिल्ला वर्षहरूमा सामाजिक सञ्जाल पनि राजनीतिक चेतना, बहस र सम्बन्धको एउटा महत्वपूर्ण माध्यम बनेको छ। मेजर राई (आस्याङ) सँग मेरो परिचय पनि त्यही माध्यमबाट सुरु भएको हो।
उहाँ दक्षिण कोरियामा रोजगारीका क्रममा रहँदा देखि नै हामी सामाजिक सञ्जालमा समसामयिक राजनीति, जनजीविका र परिवर्तनका विषयमा संवादमा जोडिएका थियौँ। प्रवासमा रहँदा पनि उहाँ देशको राजनीतिप्रति सजगतापूर्वक विचार राख्नुहुन्थ्यो। विशेषगरी उहाँका अभिव्यक्तिहरू भावनात्मक उत्तेजनामा सीमित नहुने, बरु व्यवहारिक समाधान खोज्ने खालका हुन्थे। सामाजिक सञ्जाल र म्यसेन्जर ग्रुपहरूमा हुने छलफलमा उहाँको दृष्टिकोण स्पष्ट, जिम्मेवार र सिक्न चाहने देखिन्थ्यो।
यही वैचारिक निरन्तरता र प्रतिबद्धताको परिणामस्वरूप २०७४ सालमा उहाँ उदयपुर जिल्लाको लिमचुङ्बुङ गाउँपालिकाबाट नेकपा (माओवादी केन्द्र) तर्फबाट अध्यक्ष पदमा निर्वाचित हुनुभयो। सामाजिक सञ्जालमा देखिएको विचार व्यवहारमा रूपान्तरण गर्ने अवसर पाउनु र त्यस अवसरलाई सदुपयोग गर्नु आफैंमा ठूलो कुरा हो।
पालिका प्रमुखको रूपमा उहाँले गरेको कामको मूल्याङ्कन स्थानीय जनताले नै गरेका छन्। २०७९ सालमा पुनः पार्टीको विश्वास र जनताको मतसहित दोस्रो कार्यकालको जिम्मेवारी पाउनु त्यसको स्पष्ट संकेत हो। एउटै नेतृत्वलाई दोहोर्याएर जनादेश दिनु सामान्य राजनीतिक घटना होइन, यो कामप्रतिको सन्तुष्टि र भरोसाको परिणाम हो।
स्थानीय सरकारको नेतृत्व गर्दै गर्दा मेजर राईले संघीय संरचनाको यथार्थलाई नजिकबाट बुझेको देखिन्छ। अधिकार, स्रोत र नीति निर्माणबीचको अन्तरविरोध, स्थानीय तहको सीमितता र संघीय सरकारको भूमिकाबारे उहाँको बुझाइ अनुभवजन्य छ। यही कारण आज उहाँ उदयपुर निर्वाचन क्षेत्र नं. २ बाट प्रतिनिधि सभाको उम्मेदवारका रूपमा अगाडि आउनुभएको देखिन्छ।
उहाँको उम्मेदवारी कुनै आकस्मिक निर्णय वा पदप्रतिको आकांक्षाबाट प्रेरित देखिँदैन। लामो समयको राजनीतिक अभ्यास, विकास प्रशासनको अनुभव र जिम्मेवारीबोधको स्वाभाविक निष्कर्षका रूपमा यसलाई हेर्न सकिन्छ। उदयपुरकै छोरा भएर आफ्नै गाउँ, भेग र जिल्लाको विकासलाई राष्ट्रिय समृद्धिसँग जोडेर सोच्न सक्ने नेतृत्वको आवश्यकता आज अझ बढी छ।
सामाजिक सञ्जालबाट चिनिएको एक मित्रका रूपमा मैले मेजर राईमा देखेको कुरा के हो भने |उहाँ सत्ताको भाषाभन्दा जिम्मेवारीको भाषा बोल्ने नेता हुनुहुन्छ। उपलब्धिको अत्यधिक प्रचारभन्दा प्रक्रिया, सिकाइ र सुधारमा विश्वास गर्ने स्वभाव उहाँको पहिचान बनेको छ।
डिजिटल युगमा धेरै छवि निर्माण गरिन्छ, तर सबै छवि व्यवहारमा टिक्दैनन्। सामाजिक सञ्जालमा देखिएको सोच व्यवहारमा पनि निरन्तर देखिनु भनेको नेतृत्वको एउटा महत्वपूर्ण गुण हो। यही आधारमा मेजर राई (आस्याङ) लाई अनुभव, इमानदारी र व्यवहारिक नेतृत्वको प्रतिनिधि पात्रका रूपमा हेर्न सकिन्छ।
उदयपुर निर्वाचन क्षेत्र नं. २ बाट उहाँको उम्मेदवारी विकास, रूपान्तरण र जिम्मेवार राजनीतितर्फको एउटा प्रयास हो। यो प्रयास सफल होस् भन्ने कामना सहित, सामाजिक सञ्जालमा चिनिएको एक मित्र तथा सचेत नागरिकको हैसियतले मेजर राई (आस्याङ) लाई आउँदो निर्वाचनमा हार्दिक शुभकामना र सफलताको कामना गर्दछु।
लेखक : दोङ कुबेर तामाङ
उप–महासचिव, तामाङ राष्ट्रिय मुक्तिमोर्चा नेपाल
